Trátase do maior congreso de enfermidades lisosomais a nivel mundial.
O traballo premiado logrou encapsular encimas en nanopartículas para poder administrar por vía oral unha terapia que ata o momento era por vía intravenosa.
Santiago de Compostela, 26 de febreiro de 2026.- José Víctor Álvarez González, investigador Miguel Servet do grupo de Metabolopatías do IDIS, recibiu o Premio ao Novo Investigador 2026 do WORLDSymposium, o congreso de enfermidades lisosomais de maior prestixio que se celebra a nivel mundial.
Un total de 87 investigadores júnior presentaron os seus proxectos para o premio deste ano. Tras unha revisión altamente competitiva, o Comité de Premios do WORLDSymposium seleccionou “10 persoas excepcionais para recibir as honras de 2026”, entre elas o investigador do IDIS.
O traballo presentado por José Víctor Álvarez González, Advances in the administration of ERT (oral pathway) improving the biodistribution of enzymes, estuda a posibilidade de administrar por vía oral unha terapia enzimática limitada ata agora á vía intravenosa a través dunha perfusión de 3-4 horas unha vez á semana. “Nós encapsulamos encimas en nanopartículas e podemos administralas de forma oral”, explica Álvarez González. Ademais, o tratamento actual non alcanza tecidos críticos, como o cerebro ou os ósos, polo que esta nova alternativa para a administración de encimas por vía oral centrouse tamén en lograr chegar a “órganos diana”.
O premiado expuxo o seu traballo no marco da 22.ª edición do WORLDSymposium celebrada este mes de febreiro en San Diego, California.
