HRS4R Human Resources Strategy for Researchers

O Instituto de Investigación Sanitaria de Santiago de Compostela e a Fundación Pública Galega IDIS, como a súa entidade xestora, contan desde 2020 co selo HR Excellence in Research outorgado pola Comisión Europea.

Este selo distingue ás institucións comprometidas cos principios da Carta Europea do Investigador, que velan por ofrecer ao seu persoal investigador as mellores condicións laborais e un marco apropiado para o seu desenvolvemento profesional. O selo é unha ferramenta que axuda ás organizacións para mellorar a eficiencia, a eficacia e o impacto das accións que levan a cabo para crear unha contorna laboral atractiva e promover a excelencia científica, garantindo o cumprimento dos principios éticos fundamentais e a integridade da investigación.

As organizacións acreditadas aplican os 20 principios da Carta Europea do Investigador, articulados en catro piares que cobren todos os aspectos dunha carreira investigadora.

O IDIS e a súa fundación xestora contan con políticas, procedementos e mecanismos internos aliñados con estes principios, que definen o marco de traballo do seu equipo de investigación e impulsan o desenvolvemento das súas carreiras científicas, como se detalla nos diferentes apartados desta sección.

Proceso de acreditación

IMPLEMENTATION PROCESS 2020

GAP ANALYSIS 2020

ACTION PLAN 2020

ACTION PLAN UPDATED 2023

GAP ANALYSIS 2023 - 2026

ACTION PLAN 2027-2030

OTM-R checklist 2023-2026

Ética, integridade, xénero e ciencia aberta

O primeiro piar recolle unha serie de valores transversais, que alimentan o espírito de toda a Carta Europea do Investigador, e que aspiran a fomentar os mellores equipos e proxectos de investigación posibles, libres de pexuízos de xénero ou de calquera outro tipo, plurais e integradores. Este piar reafirma valores asumidos pola comunidade científica como a liberdade, a equidade, a sustentabilidade e o coñecemento compartido. [Ler máis]

Avaliación, contratación e progresión do persoal investigador

O segundo piar pon o foco na necesidade de implantar sistemas de avaliación cualitativos e abertos á diversidade de perfís, que teñan en conta tanto a calidade científica como o impacto social e a innovación xerada pola investigación. Os procedementos de contratación deben ser abertos, transparentes e baseados en méritos, e os procesos de selección deben ser equitativos, non discriminatorios e sensibles á gama de experiencias dos candidatos. [Ler máis]

Condicións e prácticas de traballo

O terceiro piar salienta a importancia de proporcionar contornas de traballo que promovan a saúde mental e o benestar físico do persoal investigador, técnico e xestor, remuneracións xustas e atractivas, e estabilidade laboral, prestando especial atención a evitar e corrixir situacións de precariedade, particularmente nas etapas iniciais da carreira investigadora (R1 e R2). [Ler máis]

Carreira investigadora e desenvolvemento do talento

Finalmente, o cuarto piar inclúe recomendacións aos empregadores para que recoñezan e valoren a diversidade cada vez maior das carreiras científicas, considerando factores como a interdisciplinariedade, a diversidade de traxectorias, a transferencia e o emprendemento. Os empregadores deben crear as condicións e ofrecer os apoios para que as carreiras investigadoras poidan desenvolverse como un proceso de mellora continua. [Ler máis]