A spin-off do IDIS e do SERGAS, liderada integramente por mulleres e especializada en tecnoloxías avanzadas de formulación e transporte de ingredientes, foi recoñecida pola súa capacidade para transformar coñecemento científico en solucións con impacto real
Santiago de Compostela, 7 de xullo de 2026.- DIVERSA Technologies, spin-off biotecnolóxica nada do IDIS e do SERGAS e con sede no Campus Vida de Santiago de Compostela, recibiu o Primeiro Premio ao Proxecto Empresarial de Base Tecnolóxica no marco de Innovatia 8.3, unha iniciativa impulsada polo Instituto das Mulleres e a Universidade de Santiago de Compostela para apoiar e visibilizar empresas lideradas por mulleres xurdidas da contorna universitaria e de investigación.
O premio foi recollido por María de la Fuente, cofundadora e CEO/CSO de DIVERSA, durante o acto celebrado onte no Paraninfo da Universidade de Santiago de Compostela. “Este recoñecemento é moi especial para todo o equipo porque pon en valor unha forma de entender a ciencia: rigorosa, aplicada e orientada a xerar impacto máis aló do laboratorio. Tamén reforza a nosa convicción de que desde Galicia é posible construír empresas científico-tecnolóxicas ambiciosas, competitivas e lideradas por mulleres”, asegurou María de la Fuente.
Abi Vázquez, cofundadora e COO de DIVERSA Technologies asegura que o premio “recoñece o traballo dun equipo que combina ciencia, negocio, operacións e industrialización para converter investigación en proxectos e produtos reais. É tamén un impulso para seguir crecendo, xerando emprego cualificado e levando a nosa tecnoloxía a máis mercados e aplicacións”.
DIVERSA desenvolve tecnoloxías baseadas en sistemas lipídicos avanzados —nanopartículas lipídicas patentadas— que protexen, transportan e melloran o aproveitamento de moléculas e ingredientes, facilitando que activos con alto potencial poidan converterse en produtos eficaces e viables para sectores como a saúde, a biotecnoloxía, a cosmética avanzada (baixo a submarca Sphirence™), a nutrición e a alimentación funcional.
O xurado de Innovatia 8.3 valorou a solidez científico-tecnolóxica de DIVERSA, a súa traxectoria de transferencia de coñecemento desde a investigación pública, o seu potencial de crecemento e o liderado dun equipo 100% feminino en todos os niveis, incluídos os postos directivos de Dirección Xeral, Dirección Científica, Dirección Financeira, Dirección de Operacións e Xestión de Proxectos.
A compañía combina actividade de I+D propio —co proxecto NeoGaRT en nanoinmunoterapia para cancro gástrico, recentemente financiado pola AECC no seu convocatoria IMPACTO 2025—, servizos de formulación e co-desenvolvemento para empresas biotech e farmacéuticas, comercialización de reactivos de laboratorio a través de distribuidores internacionais de primeiro nivel como Avantor VWR, e desenvolvemento de ingredientes cosméticos propios baixo a marca Sphirence™. Este modelo circular permite que os ingresos de ciclo rápido financien o desenvolvemento de nanomedicamentos avanzados para enfermidades sen solución terapéutica.
A empresa conta con dúas patentes internacionais concedidas en Europa, EE.UU., Xapón, Corea do Sur e Canadá, máis de 2 millóns de euros en financiamento público competitivo captada, unha rolda privada de 375.000 € pechada con investidores especializados, e acordos de co-desenvolvemento activos con máis de 11 empresas nacionais e internacionais.
