O estudo proba que a incorporación da elastografía por ondas de corte (SWE) e a imaxe microvascular de alta resolución (SMI) melloran a precisión diagnóstica nos tumores de tecidos brandos
Santiago de Compostela, 2 de setembro de 2026.- O artigo Shear-Wave Elastography, Superb Microvascular Imaging, and B-mode US for Diagnostic Accuracy in Soft Tissue Tumors publicado na revista Radiology recibiu unha ampla difusión internacional nas primeiras horas tras a súa publicación. O texto conta, ademais cun Editorial Comment dos doutores Kenneth S. Le (Wisconsin) e Zachary E. Stewart (Harvard), algo rechamante “que só adoitan facer naqueles traballos que se consideran relevantes”, explica o autor principal do artigo, o doutor David Macía Suárez, investigador do grupo Radioloxía do IDIS.
Ademais, un dos portais de maior difusión radiolóxica mundial, o estadounidense AuntMinnie.com, publicou unha reseña exclusiva sobre o traballo liderado polo Dr. Macía Suárez sobre diferenciación entre tumores de tecidos brandos benignos e non benignos, un reto aínda pendente. Este estudo avaliou se a elastografía e a imaxe microvascular complementan a ecografía convencional —que por si soa pode ser insuficiente para determinar con seguridade a natureza dalgunhas lesións— e melloran a precisión diagnóstica.
O obxectivo é “avaliar a capacidade das técnicas de ecografía —ecografía en modo B, elastografía por ondas de corte (SWE) e imaxe microvascular de alta resolución (SMI)— para diferenciar os tumores de tecidos brandos benignos do non benignos”, explica o Dr. Macía Suárez.
O estudo incluíu pacientes consecutivos con TTS remitidos para biopsia entre febreiro de 2022 e xullo de 2023. Incluíronse un total de 167 lesións de 167 pacientes, e a conclusión é que as técnicas SWE e SMI melloraron a precisión diagnóstica na avaliación dos tumores de tecidos brandos, o que podería xerar un cambio no manexo diagnóstico deste tipo de pacientes. En resumo, “a ecografía non só pode mostrar como é un tumor, senón tamén achegar información cuantitativa sobre a súa rixidez e a súa microvascularización”, en palabras do autor principal.
Estes resultados abren a porta a un uso máis preciso da ecografía no estudo dos tumores de tecidos brandos. A incorporación de información sobre a rixidez do tumor e a súa microvascularización, ademais das características que xa achega a ecografía convencional, podería axudar no futuro a identificar con maior seguridade que lesións presentan características sospeitosas e cales poderían requirir unha avaliación máis invasiva, como unha biopsia.
Como sinalan os autores do Editorial Comment que acompaña o traballo en Radiology, estes achados poderían ter implicacións na toma de decisións clínicas, a selección das lesións que deben biopsiarse e a planificación do tratamento. Aínda que aínda son necesarios novos estudos antes de establecer un protocolo diagnóstico definitivo, os resultados suxiren que estas novas ferramentas poden achegar información adicional relevante sen abandonar unha técnica tan accesible como a ecografía.
