O evento fomenta o intercambio e a cooperación científica e tecnolóxica entre China e España, co obxectivo de potenciar a colaboración en materia de innovación
Santiago de Compostela, 18 de novembro de 2026.– O China-Spain Innovation Day 2026 reuniu en Madrid, o 16 de novembro, a representantes de ambos os países para explorar oportunidades de colaboración en ciencia, tecnoloxía e desenvolvemento.
Unha xornada na que a innovación sanitaria tivo un papel protagonista. Un dos momentos destacados do bloque de ciencias da vida e saúde foi a intervención da investigadora do IDIS Yolanda Prezado Alonso. A líder do grupo Novos enfoques en radioterapia (NARA) participou no espazo dedicado a presentar proxectos de investigación e oportunidades de colaboración.
A súa participación puxo o foco no coñecemento e as capacidades investigadoras que se desenvolven desde Galicia, dentro dun foro que busca achegar a investigación a novas oportunidades de cooperación entre China e España.
Neste encontro, que pon en contacto a institucións, investigadores e profesionais dos dous ecosistemas, participou tamén o xerente do Clúster Saúde de Galicia Iván Rarís Filgueira. “Abrir o ecosistema galego de saúde a novas alianzas, tamén a nivel internacional, é un dos obxectivos de BFHEALTH&CARE, a iniciativa que impulsamos xunto ao Igape e Xesgalicia para transformar os retos do sector sanitario en oportunidades de emprendimiento e levar o coñecemento que se xera en Galicia até solucións con impacto real”, explican desde o Clúster.
O IDIS comparte este obxectivo de conectar equipos, compartir proxectos e abrir novas vías de traballo conxunto para seguir innovando en saúde.



