C009 – Investigación Traslacional en Enfermidades do Aparato Dixestivo

Obxectivos

O noso grupo de investigación desenvolve líiñas de investigación clínica e investigación traslacional en enfermidades do aparato dixestivo, en concreto nas áreas que a continuación se enumeran.

• Bases etiopatoxenéticas e fisiopatolóxicas das enfermidades do páncreas exocrino e as súas implicacións diagnósticas e terapéuticas. Efecto de hábitos tóxicos (consumo de alcol e tabaco) sobre o risco de pancreatite crónica, a idade e o modo de presentación clínica da enfermidade, a súa evolución clínica e pronóstico, e o risco de desenvolvemento do cancro de páncreas. Factores xenéticos de predisposición ó desenvolvemento de pancreatite crónica e cancro de páncreas (mutacións dos xenes do tripsinóxeno catiónico, SPINK1 e CFTR). Estudo do proceso de fibroxénese pancreática en pancreatite crónica e a súa cuantificación mediante técnicas serolóxicas e elastográficas. Estudo molecular e biolóxico do cancro de páncreas e as súas implicacións clínicas sobre as características do tumor (grao de diferenciación celular e extensión locorrexional), a supervivencia do enfermo, e o seu potencial aplicación como dianas terapéuticas. Efecto potencial de bacterias citotóxicas ailladas de tumores pancreáticos sobre o proceso de carcinoxénese en cancro de páncreas.
• Bases epidemiolóxicas, etiopatoxénicas e terapéuticas da enfermidade inflamatoria intestinal (enfermidade de Crohn e colite ulcerosa). Epidemioloxía da enfermidade inflamatoria intestinal e a súa relación con hábitos dietéticos, tóxicos e hábitos de vida. Papel da infección por bacterias psicotróficas na etiopatoxenia da enfermidade de Crohn. Eficacia de novos fármacos inmunomoduladores no tratamento de pacientes con enfermidade inflamatoria intestinal corticodependente e corticorresistente.
• Impacto de carcinoma hepatocelular e o seu tratamento percutáneo local na supervivencia dos pacientes en listas de espera para transplante hepático. Eficacia antitumoral e perfil de seguridade da inxección percutánea de etanol como tratamento neoadxuvante do carcinoma hepatocelular en lista de espera de transplante hepático. Eficacia antitumoral da radiofrecuencia percutánea como tratamento neoadxuvante do carcinoma hepatocelular e das metástases hepáticas de tumores de outras localizacións.

Líder
Domínguez Muñoz, Juan Enrique