Santiago de Compostela, 30 de maio de 2025.
O grupo de investigación IDIS NefroCHUS, dirixido polo biólogo Miguel García, organiza este ano as 2ª Xornadas de Investigación Traslacional RICORS2040-RENAL. As xornadas terán lugar en Portonovo, no concello de Sanxenxo, do 30 de maio ao 1 de xuño.
A primeira xornada terá lugar no Salón Multiusos do Concello. A inauguración do evento correrá a cargo do alcalde de Sanxenxo, Telmo Martín; o coordinador da rede RICORS 2040-RENAL, Alberto Ortiz; e o organizador das xornadas, Miguel García. Esa mesma tarde, o tema principal das xornadas e reunións centrarase nas vesículas extracelulares, o seu estudo e as súas posibles aplicacións médicas. Entre os relatores estiveron María Pardo, investigadora principal do grupo de Obesidomics do IDIS, e investigadores do Instituto de Investigación en Ciències La Salut, Germans Trias I Pujol, Marcella Franquesa e Francesc Borràs, entre outros.
A segunda xornada celebrarase no Auditorio do Pazo Emilia Pardo Bazán, de Sanxenxo, e estará dividida en cinco seccións temáticas: dano, reparación, envellecemento nas fases da enfermidade renal terminal, envellecemento vascular na Enfermidade Renal Crónica (ERC) e impacto sistémico da ERC. A conferencia principal correrá a cargo de Alberto Ortiz, quen, ademais de coordinador da rede RICORS 2040-Renal, é xefe de Nefroloxía e Hipertensión no Hospital Universitario Fundación Jiménez Díaz.
Os investigadores volverán reunirse o domingo nunha sesión no Salón Social do Hotel Atalaya I de Portonovo, onde revisarán os temas tratados nas xornadas anteriores e debaterán e planificarán posibles publicacións conxuntas resultantes desta reunión, así como as conclusións extraídas do evento. A parte máis recreativa da experiencia comezará entón cun paseo en barco pola ría de Pontevedra, que incluirá unha visita á aldea de Combarro.
