Pelayo García, investigador do IDIS e un dos promotores da actividade, agradeceu a participación de tódalas persoas así como o apoio de patrocinadores e entidades colaboradoras e organizadoras
Santiago de Compostela, 28 de setembro de 2026.– Máis de 300 persoas participaron este último domingo de setembro na III Carreira de Orientación polo Ictus, unha iniciativa deportiva e solidaria organizada polo Grupo Ictus Traslacional (TREAT), do Instituto de Investigación Sanitaria de Santiago de Compostela (IDIS), que se celebrou nos exteriores da Cidade da Cultura de Galicia.
A actividade volveu combinar deporte, divulgación e solidariedade co obxectivo de contribuír a visibilizar o ictus e o impacto desta enfermidade nas persoas afectadas e nas súas familias. A recadación obtida a través das doazóns destinarase a Dano Cerebral Galicia, entidade dedicada á atención e apoio das persoas con dano cerebral adquirido e das súas familias.
Tras a carreira, Pelayo García, investigador do IDIS e un dos promotores da actividade, quixo agradecer, en nome da organización, a participación de todas as persoas que fixeron posible esta terceira edición, así como o apoio dos patrocinadores e entidades colaboradoras e organizadoras: o grupo TREAT do IDIS e a Federación Galega de Orientación (FEGADO).
Así mesmo, a organización destacou a importancia de recoñecer o valor das persoas que sufriron un ictus e das súas familias, protagonistas e destinatarias do compromiso que impulsa esta iniciativa. Esta terceira edición dá continuidade a unha proposta que xa contara cunha importante participación nas súas dúas convocatorias anteriores, consolidando a carreira como un punto de encontro entre actividade física e concienciación sobre o ictus.
