E014 – Enfermidades por Prións

Obxectivos

O traballo do noso grupo céntrase en investigar o papel do mal pregamento de determinadas proteínas nos mecanismos que desencadean certas encefalopatías. En concreto, investigamos tres enfermidades, as enfermidades priónicas, a encefalopatía de Celia e a esquizofrenia.
As enfermidades priónicas son doenzas neurodexenerativas mortais causadas polo mal pregamento da proteína priónica, PrP. Unha vez mal pregada, a PrP convértese nun prión, é dicir, unha proteína capaz de propagar a súa conformación mal pregada a outras unidades de PrP.
O noso traballo céntrase en elucidar la estrutura do prión, algo imprescindible para entender o mecanismo de propagación da enfermidade. Para iso utilizamos técnicas bioquímicas, de microscopía electrónica e de RMN.
A encefalopatía de Celia é unha rara enfermidade neurodexenerativa hereditaria causada por unha mutación particular do xene que codifica a seipina. Foi descuberta e descrita por David Araújo fai apenas uns anos, en colaboración co noso grupo. A seipina é unha proteína implicada na formación de gotas de graxa, por exemplo nos adipocitos, pero tamén expresada abundantemente no cerebro.
Finalmente, a esquizofrenia é unha enfermidade moi coñecida e prevalente, se ben os seus mecanismos moleculares son pouco coñecidos, máis alá das alteracións nos sistemas de sinalización dopaminérxicos e glutamatérxicos, ben caracterizadas pero cuxa causa última é un misterio. Partindo da hipótese formulada recentemente por Carsten Korth, según a cal o mal pregamento e agregación da proteína cerebral DISC1 podería xogar un importante papel na patoloxía da esquizofrenia, estamos estudando esta proteína e caracterizando as súas funcións mediante aproximacións proteómicas.