Santiago de Compostela, 3 de abril de 2024.- A Escola Internacional de Doutoramento da Universidade de Santiago de Compostela (USC) publicou a lista de premios extraordinarios en catro áreas de coñecemento. Un deles é Ciencias da Saúde, no que 12 estudantes recibiron un premio extraordinario, dos cales 7 leron as súas teses no Instituto de Investigación Sanitaria de Santiago. Ademais, outro estudante do IDIS foi premiado na área de Ciencias e Enxeñaría.
En Ciencias da Saúde, Víctor Santos Rosales e María Vivero López, ambos do grupo de I+D en Formas de Dosificación e Sistemas de Administración de Medicamentos, obtiveron un premio extraordinario; Ana Alonso Pérez e Eloi Franco Trepat, do grupo de Patoloxía Musculoesquelética; Antía Fernández Pombo, do grupo de Epixenómica en Endocrinoloxía e Nutrición; Marinela Couselo Seijas, de Cardioloxía Translacional e Óscar Rapado González, de Oncoloxía Médica Translacional. Ademais, Nicolás Vila Blanco, do grupo de Ciencias Odontolóxicas (OSRG), tamén recibiu un premio extraordinario na área de Ciencias e Enxeñaría.
Os premios extraordinarios de doutoramento supoñen un recoñecemento ao esforzo e á excelencia académica en diversas áreas de coñecemento. Concédense a teses de doutoramento que foron valoradas como destacadas e que destacan pola súa calidade e contribución significativa ao ámbito de estudo.
A dirección do centro felicita tanto aos premiados como aos que dirixiron as súas teses xa que son, en boa medida, os responsables da calidade do traballo que se desenvolve no IDIS en todos os ámbitos.
