Quen somos

O Instituto de Investigación Sanitaria de Santiago (IDIS) é un centro de investigación biomédica de marcado carácter traslacional que aproveita as sinerxias do Complexo Hospitalario Universitario de Santiago de Compostela (CHUS) e da Universidade de Santiago de Compostela (USC) para impulsar, promover e fomentar a investigación de excelencia, o coñecemento científico e tecnolóxico e a súa posterior translación ao sector produtivo, así como a docencia e a formación e sempre cun obxectivo claro: mellorar a saúde da poboación.

Constituíuse o 31 de xaneiro de 2008, mediante un convenio de colaboración entre a Consellería de Sanidade, o Servizo Galego de Saúde e a Universidade de Santiago de Compostela e está acreditado desde marzo de 2010 como centro de investigación do Sistema Nacional de Saúde, polo Instituto de Salud Carlos III, renovando dita acreditación cada 5 anos: 18 de maio de 2015, 10 de marzo de 2020 e 10 de marzo de 2025.

Na actualidade 1395 persoas intégranse en 113 grupos de investigación, organizados á súa vez en 7 áreas de investigación: (A001) Oncoloxía, (A002) Xenética e Bioloxía de Sistemas, (A003) Endocrinoloxía, Nutrición e Metabolismo, (A004) Neurociencias e (A005) Plataformas e Metodoloxía, (A006) Cardiovascular e (A007) Infectoloxía, Inflamación e Vacinas.

No ano 2024 publicáronse 1091 artigos científicos orixinais, editoriais e críticas en 603 revistas internacionais indexadas no Journal Citation Report cun índice de impacto total de 7.012,6 puntos e un índice de impacto medio de 6,4 puntos. Do total de publicacións, 742 están no Q1 e delas, 321 están no D1. 49.925.087 € recadáronse en 137 proxectos de investigación en concorrencia competitiva, 95 axudas de RRHH, 378 estudos clínicos e 643 contratos e convenios de colaboración.

No ámbito docente, os investigadores do IDIS realizaron un intenso traballo dirixindo 109 teses de doutoramento.