O investigador únese á entidade que xurdiu do proxecto iniciado polo Grupo Hospitalario de Apoio ao Coidador do Hospital Clínico de Santiago en 2019
Santiago de Compostela, 21 de setembro de 2026.– O líder do grupo Neuroenvellecemento do IDIS, Tomás Sobrino, incorporouse á asociación Galzheimer Care para reforzar a súa vertente científica e abrir novas liñas de traballo en torno ao Alzheimer e outras enfermidades neurodexenerativas.
“A súa experiencia permitiranos seguir achegando a investigación e o coñecemento científico ás necesidades reais das persoas con Alzheimer e, tamén, das súas familias e coidadores”, asegurou a entidade con motivo do Día Mundial do Alzheimer, que se conmemora este luns, 21 de setembro, para lembrar o impacto que esta enfermidade ten en quen a padecen e tamén nas persoas que coidan. Un labor que, lembran, ”se prologa durante anos e esixe información, formación, acompañamento e ferramentas”.
Así mesmo, desde Galzheimer Care reivindican a necesidade de contemplar a enfermidade desde unha perspectiva “integral”, xa que transforma a vida de quen recibe o diagnóstico, pero tamén a de toda a súa contorna. Por iso, a entidade afirmou que avanzar na investigación resulta “imprescindible”, pero tamén o é acompañar as familias e proporcionarlles coñecemento e ferramentas durante todo o proceso.
