Santiago de Compostela, 13 marzo de 2024.- A esquizofrenia é unha enfermidade mental complexa que afecta a preto do 1% da poboación mundial e que entre un 20 e un 50% dos pacientes non responden aos antipsicóticos tradicionais, o que se coñece como esquizofrenia resistente ao tratamento (TRS). “Isto supón un gran reto, tanto para os enfermos como para os profesionais, xa que leva a un peor prognóstico e unha maior carga da enfermidade”, explica Roberto Agís, do grupo ITEN (Investigación Translacional en Enfermidades Neurolóxicas) do IDIS.
O doutor Agís é o director dun estudo destinado a mellorar o diagnóstico, segemento e tratamento destes pacientes. Este é o traballo que se publicou baixo o título “Diferenzas MiRNA relacionadas coa esquizofrenia resistente ao tratamento”, no que tamén participaron o doutor José María Prieto González, do mesmo grupo, así como persoal investigador do IIS. Sur de Galicia.
Estudo esperanzador
O doutor Agís Balboa explica que os miARN son pequenas moléculas de ARN que regulan a expresión xénica e que se relacionaron con diversas enfermidades, entre elas a esquizofrenia. O estudo analizou os niveis de miARN no sangue de 40 pacientes con esquizofrenia, 21 con TRS e 19 que responden á medicación. Os resultados revelaron un perfil de 16 miRNAs que diferenciaban, cunha precisión superior ao 70%, os pacientes con TRS dos respondedores.
“Estas diferenzas nos niveis de microARN (miARN) en pacientes con esquizofrenia resistente ao tratamento en comparación cos que responden á medicación representan un achado que podería ser crucial no desenvolvemento de novos biomarcadores e estratexias de tratamento para TRS”, explica Daniel Pérez-Rodríguez, primeiro autor do traballo.
O estudo non só se limitou a identificar miRNAs diferenciais, senón que tamén explorou as posibles vías moleculares implicadas na TRS. Descubriuse que a resposta ao estrés parece ser un factor clave na TRS, e destacáronse as proteínas p53, SIRT1, MDM2 e TRIM28 como posibles mediadores desta resposta.
Detección precoz e intervención personalizada
O traballo abre novas posibilidades para o diagnóstico e tratamento do TRS. Os 16 miARN identificados poderían utilizarse como biomarcadores para a detección precoz de TRS, permitindo unha intervención máis precisa e personalizada. Ademais, as vías moleculares reveladas poderían ser obxectivos para o desenvolvemento de novas terapias destinadas a combater a TRS de forma máis eficaz.
O estudo, publicado no International Journal of Molecular Sciences (IJMS), foi un dos máis descargados o ano pasado, segundo a propia revista científica. O equipo do IDIS que participou na investigación asegura que se trata dun “paso importante para mellorar o diagnóstico, seguimento e tratamento da esquizofrenia resistente ao tratamento”, e confían en que futuras investigacións baseadas nestes achados desemboquen en novas ferramentas e estratexias para mellorar a calidade de vida dos pacientes con TRS.
O artigo orixinal pódese consultar en https://www.mdpi.com/1422-0067/24/3/1891
