C018 – Neuroloxía Experimental da Enfermidade de Parkinson

Liñas de investigación

O noso laboratorio desenvolve 2 liñas de investigación:

(1) Estudo dos mecanismos celulares e moleculares involucrados na dexeneración das neuronas dopaminérxicas na enfermidade de Parkinson (EP), orientado ó deseño de estratexias terapéuticas neuroprotectoras.

(2) Estudo de mecanismos implicados na diferenciación de células nai neuronais e iPS a neuronas dopaminérxicas, como posible fonte para terapia celular en EP.

Na primeira liña empréganse diversos modelos de EP in vivo e in vitro para estudar mecanismos endóxenos que potencian a xeración de estrés oxidativo nas neuronas dopaminérxicas, así como a reacción inflamatoria microglial que potencia a progresión do proceso dexenerativo. Preténdese identificar dianas para tratamentos neuroprotectores.

No referente á segunda liña, este grupo traballou durante anos sobre transplantes de neuronas dopaminérxicas embrionarias en modelos de EP. Actualmente trabállase na proliferación e diferenciación de precursores neurais e células IPs cara neuronas dopaminérxicas para o seu posterior transplante e avaliación funcional en modelos animais de EP, así como para investigar mecanismos involucrados en EP.