O ictus cerebral representa unha das principais causas de discapacidade e a segunda causa de morte, tanto en España como no resto de países desenvolvidos, o que xera unha gran demanda asistencial e un elevado gasto sanitario. Hoxe non existe un tratamento protector, máis aló de terapias recanalizantes, polo que a busca de novos fármacos para esta patoloxía supón unha necesidade clínica de primeiro nivel, explica Francisco Campos Pérez.
O doutor Campos é investigador principal do grupo Ictus Traslacional do IDIS, que leva máis de oito anos investigando o desenvolvemento dun novo fármaco con efecto terapéutico e protector para a fase aguda do ictus, que consiste na administración da proteína recombinante rGOT.
Financiado a través do Programa Ignicia (proba de concepto) da Axencia Galega de Innovación da Xunta de Galicia, o grupo IDIS ten como obxectivo desenvolver unha nova versión da proteína recombinante rGOT e lograr a produción dun lote clínico de uso inmediato humano. Para iso utilizarán a tecnoloxía CrisBio®, un proceso totalmente automatizado, económico e innovador para obter produtos biolóxicos recombinantes para uso humano en pupas de insectos.
“A principal vantaxe deste proceso fronte a outros sistemas é o baixo custo de produción e as altas prestacións”, explica o doutor Campos Pérez. “O noso enfoque comercial, e o resultado futuro esperado, é establecer un acordo de licenza cunha empresa farmacéutica disposta a desenvolver e investir no noso produto para a súa posterior validación e aplicación clínica”.
