O proxecto de cribado xenómico neonatal recibiu o premio Acción Investigadora.
Santiago de Compostela, 28 de maio de 2026.– Este xoves entregáronse os VI Premios Redacción Médica á Sanidade de Galicia, que cada ano reúne a destacados protagonistas do sistema sanitario galego. O conselleiro de Sanidade, Antonio Gómez Caamaño, presidiu o evento destinado a visibilizar a excelencia dos profesionais da saúde que a diario traballan en beneficio do paciente na nosa comunidade autónoma.
Competían 56 candidaturas pertencentes a 14 categorías, entre as que estaba “Acción Investigadora”, onde resultou gañador o Proxecto de cribado xenómico neonatal Cringenes, do Instituto de Investigación Sanitaria de Santiago de Compostela (IDIS). Redacción Médica destacou que se trata dunha iniciativa que sitúa á comunidade “na primeira liña” da medicina preventiva europea. “Ao integrar a xenómica coa metabolómica e a avaliación bioética, Galicia non só amplía o seu xa ambicioso programa de detección precoz, senón que xera a evidencia científica necesaria para transformar o futuro da Saúde Pública”.
Recolleu o premio María Luz Couce Pico, directora científica do IDIS e investigadora principal deste proxecto destinado a desenvolver un programa piloto de cribado neonatal xenómico que permita ampliar e complementar o cribado bioquímico actual, incluíndo aquelas enfermidades que actualmente non dispoñen de marcadores de detección bioquímicos, pero para as que xa existen opcións terapéuticas.
